Քանյե Ուեսթի առաջիկա համերգները Լեհաստանում և Շվեյցարիայում չեղարկվել են, քանի որ ավելի ու ավելի շատ եվրոպական երկրներ դադարեցնում կամ հետաձգում են ամերիկացի ռեփերի ելույթները՝ նրա նախկին հակասեմիտական հայտարարությունների շուրջ բարձրացած աղմուկի պատճառով։
Շվեյցարական ֆուտբոլային ակումբ ՖԿ Բազելը, որը պատասխանատու է Սենտ Յակոբ-Պարկ մարզադաշտում անցկացվող համերգների և միջոցառումների համար, շաբաթ օրը Reuters-ին հայտնել է, որ ուսումնասիրելով Ուեսթի՝ հունիսին այնտեղ ելույթ ունենալու հայտը, որոշել է մերժել այն։
«Մենք չենք կարող, մեր արժեքներին համապատասխան, այս իրավիճակում հարթակ տրամադրել տվյալ արտիստին», – Reuters-ին ասել է ակումբի ներկայացուցիչը։
Ուրբաթ օրը Լեհաստանի Խոժուվ քաղաքում գտնվող Սիլեզիայի մարզադաշտը նույնպես հայտարարեց, որ կչեղարկի Ուեսթի հունիսի 19-ին նախատեսված համերգը, այն բանից հետո, երբ Լեհաստանի մշակույթի նախարարությունը հայտարարել էր, որ փորձում է արգելել Ուեսթին ելույթ ունենալ երկրում։
«Ye-ի (Քանյե Ուեսթ) համերգը, որը նախատեսված էր 2026 թվականի հունիսի 19-ին Superauto.pl Սիլեզիայի մարզադաշտում, չի կայանա՝ իրավական և ձևական պատճառներով», – ասվում է մարզադաշտի տնօրեն Ադամ Ստրժիժևսկու հայտարարության մեջ։
Լեհաստանի մշակույթի նախարար Մարտա Ցենկովսկան ավելի վաղ ասել էր, որ Ուեսթի «նացիզմի քարոզը» «ակնհայտորեն հակասում է Լեհաստանի արժեքներին», և դատապարտել էր նրան որպես արտիստի, ով «բացահայտ հայտարարում է, որ սիրում է Հիտլերին, տարածում է նացիստական գաղափարախոսություն և գումար է վաստակում սվաստիկայով շապիկներ վաճառելով»։
«Հոլոքոստի պատմությամբ նշանավորված երկրում մենք չենք կարող ձևացնել, թե սա պարզապես զվարճանք է», – գրել էր Ցենկովսկան սոցիալական ցանցերում։
Նա նաև ավելացրել էր, որ Վարշավան ունի անցանկալի անձանց մուտքը արգելելու միջոցներ և, անհրաժեշտության դեպքում, «կկիրառի դրանք»։
Լեհաստանի և ՖԿ Բազելի որոշումները կայացվել են այն բանից օրեր անց, երբ 48-ամյա ռեփերը, ով իրավաբանորեն հայտնի է որպես Ye, հետաձգեց Ֆրանսիայի Մարսել քաղաքում նախատեսված համերգը՝ տեղական իշխանությունների հակազդեցությունից հետո։
Այս ամսվա սկզբին Մեծ Բրիտանիան նույնպես արգելեց Ուեսթի մուտքը երկիր՝ Լոնդոնի Wireless փառատոնի գլխավոր ելույթ ունենալու համար, ինչի արդյունքում ամբողջ փառատոնը չեղարկվեց, որտեղ նա պետք է ելույթ ունենար երեք գիշեր՝ հուլիսին։
Ուեսթի հայտարարված եվրոպական շրջագայությունից այժմ մնացել են միայն Թուրքիան, Նիդեռլանդները, Իտալիան, Մադրիդը և Պորտուգալիան։
Ուեսթը նախկինում հայտարարել է՝ «Ես սիրում եմ նացիստներին», արտահայտել է հիացմունք Ադոլֆ Հիտլերի նկատմամբ, իր կայքում վաճառել է սվաստիկայով շապիկներ, և անցյալ տարի թողարկել է «Heil Hitler» վերնագրով երգ, որը արգելվել է մի շարք հոսքային հարթակներում։
Հունվարին նա Wall Street Journal-ում ամբողջական էջով հայտարարություն է հրապարակել՝ նշելով. «Ես նացիստ կամ հակասեմիտ չեմ» և «Ես սիրում եմ հրեաներին»։ Նա իր հակասեմիտական վարքը կապել է «մանիակալ էպիզոդի» հետ, որը պայմանավորված է իր բիպոլար-1 խանգարմամբ։
Սա առաջին դեպքը չէր, երբ Ուեսթը ներողություն էր խնդրում. 2023-ին նա եբրայերեն հայտարարություն էր հրապարակել՝ խնդրելով հրեաներից ներողություն, սակայն հետագայում հետ էր վերցրել այն և 2025-ին հայտարարել իրեն նացիստ։
