Մեր պաշտպանյալ, 18 տարեկան դպրոցական, ծանր առողջական խնդիրներ ունեցող Դավիթ Մինասյանը կալանավորվեց։
Ամեն օր, երբ կարծում ենք, որ իրավունքի գերակայության ոտնահարումը հասել է իր գագաթնակետին, ականատես ենք լինում դրա էլ ավելի աբսուրդային դրսևորումներին։
Ավելորդ է խոսել այն մասին, որ Դավիթին վերագրվող «հանցանքի» հիմնավոր կասկածի նվազագույն շեմն անգամ չի հաղթահարվում, բացակայում են խափանման միջոցի կիրառման հիմքերը։ Ավելորդ է խոսել նաև անձի՝ ընդամենը 18 տարեկան, առողջական խնդիրներ ունեցող դպրոցականի նկատմամբ բանտային կալանքի կիրառման հնարավոր հետևանքների մասին՝ թե՛ սոցիալ-հոգեբանական առումով, թե՛ ֆիզիկական առողջության տեսանկյունից։ Իր դպրոցի վերջին զանգին պատրաստվելու փոխարեն Դավիթը գտնվելու է «Արմավիր» քրեակատարողական հիմնարկում՝ զրկված նաև իրեն անհրաժեշտ բժշկական օգնությունից։
Կալանքը շարունակում է օգտագործվել որպես պատժիչ գործիք, անձանց ահաբեկելու միջոց՝ անգամ Դավիթի նման դպրոցականների նկատմամբ։
Նշվածն այլ կերպ, քան ազգային ողբերգություն, որակել հնարավոր չէ։
Դավիթ Մինասյանի պաշտպան՝ Հակոբ Կուրեղյան
